Ons kyk na die fotos en sien net groot glimlagte en kan sien F.J en Leanthe is ‘n paartjie wat goeie vriende is en daarvan hou om saam te lag. Hulle albei lyk baie gemaklik voor die fotograaf se lens en ons kan sien die troue is glad nie ‘n stywe besigheid nie. Die gaste het die spesiale dag saam F.J en Leanthe geniet.
Die prettige feesvieringe was by die spog plaas Nantes Estate gehou. Die Venue gee jou die gevoel van ‘n statige ou plaas huis met kamers onder waar die bruid kan aantrek en klaar maak en ‘n kroeg area waar gaste onthaal kan word terwyl die paartjie hul fotos laat neem. Op die eerste vloer is die hele vertrek oop en daar kan gelag en gedans word sonder dat iemand afgesny voel deur ‘n muur of pilaar. Dit is ‘n lekker onthaal saal vir al vir diegene wat aan Fomo ly en die vrees het om uit te mis.
Vertel ons hoe het julle ontmoet en die eienskappe wat julle na mekaar aangetrek het?
Tussen vriende het ons ontmoet en tussen vriende het ons liefde geblom. Leanthe en F.J. is aanmekaar voorgestel deur ‘n vriend wat saam met F.J. studeer het.
Vir Leanthe was dit liefde met eerste oogopslag – F.J. was ‘n blondekop “surfer” met pragtige blou oë. Na ‘n maand het ons amptelik onsself as paartjie bekend gestel.
Leanthe is ‘n vrou wat nie omgee om te gee nie – maak nie saak of dit tyd, geselskap of materiële dinge is nie. Dit wys veral in haar Graad R klas waar sy haar liefde vir kinders uitbeeld. Sy is vasberade en werk hard om haar doelwitte te bereik. F.J. is saggeaarde, vriendelike en passievolle mens wat altyd beskikbaar is om te help.
Inspirasie en tema van jul troue
Ons tema was gebaseer op pret, plesier en lekker lag. Vanaf die eerste dag wat ons aan ons troue begin beplan het, was ons hoofdoel om te verseker dat almal ‘n lekker tyd het. Ons wou gehad het ons vriende moet terugdink aan ons troue en sê dit was ‘n partytjie-troue. Ons het dus moeite gedoen om klein verrassinkies in plek te sit soos “glowstick” strooitjies, maskers op die dansvloer om mee foto’s te neem en ‘n ingehuurde fotohoekie wat foto’s druk wat mens kan huis toe neem. Ons het ook ons troukoek so beplan dat almal koek kon saamneem huis toe.
Vertel ons van jul Wittebrood
Ons het nie onmiddellik op wittebrood gegaan nie. Om ‘n troue te reël op jou eie is effens stresvol en ons wou eers na die troue ontspan en gewoond raak aan die getroude lewe. Ons het in April getrou en die wittebrood so beplan dat ons in Julie na Phuket, Thailand reis.
Advies vir ander paartjies
Vir die bruid: Dit mag gebeur dat jou verloofde sê: “Dit maak nie vir my saak nie. Solank jy gelukkig is, is ek gelukkig”. Moenie dan kwaad raak en sê dat hy nie belangstelling toon nie. Ons het saam besluit op die belangrikste: fotograaf, venue en D.J. Vir die res kan jy vir jou verloofde die opsies wys en dan vra hoe dit vir hom lyk of hoe hy daaroor voel. Sodoende vermy mens onnodige konflik wat die fokus wegneem van die lekkerte van julle troue beplan.
Vir die paartjie: Die dag vlieg verby! Moenie tyd en geld mors op reëlings en items wat jy dink ander mense wil hê of verwag nie. Dis julle dag – beplan dit só dat julle gelukkig gaan wees op die dag en nie eendag terugkyk en spyt is nie.
Het julle gebruik gemaak van ‘n Videograaf
Ons het nie gebruik gemaak van ‘n professionele videograaf nie. Ons het 2x Go-Pro kameras by ons troue gehad wat uit verskillende perspektiewe video’s geneem het. Ons hou beide daarvan om ons eie video-materiaal te verwerk en dan ‘n spesiale video daarvan te maak. Dit was ook vir ons lekker om die dag na ons troue na die video’s te kyk en alles weer te beleef. Ons kon self kies watter dele van ons dag ons in ‘n video wil inwerk en dit het die video baie spesiaal gemaak.
Diensverskaffers:
- Venue: Nantes Estate
- Hare en grimering: Ida Webster
- Uitdruk van skryfbehoeftes: Joli Creations and Designs
- Trourok: The Wedding Boutique
- Strooimeisies se rokke: ‘n Oudonderwyseres van Leanthé het die rokkies gemaak
- Strooijonkers se klere: Aangekoop by Woolworths
- Bruidegom se pak: Marco Benetti, gekoop aanlyn op Spree
- Troukoek: The Velvet Cake Company
- Platejoggie: D.J. Dean Hewitt
- Blomme en versierings: To-Nett’s Flower and Decor
- Fotograaf: Liesl le Roux
