Jaques & Tiffany se Plaas Verlowing Fotosessie

Ons is baie opgewonde om Jaques en Tiffany se plaas verlowing fotosessie met Mooi Troues se lesers te deel.  Die paartjie se verlowing fotosessie is besonders mooi en paartjies kan sommer baie idees kry vir hul eie verlowing fotosessie.

Tiffany en Jacques se uitrustings het die perfekte kontras geskep teen die onafgewerkte plaas landskappe as agtergrond.  Hulle neutrale uitrustings was perfek vir die fotosessie en al die aandag was op die paartjie.

Die bewolkte weer het só mooi gewerk by die paartjie se fotosessie.  Die plaas landskappe in die agtergrond is effens donker en dramaties, wat weereens die aandag trek na die paartjie.  Jy kon sien hulle het die fotosessie sommer baie geniet en was definitief baie gemaklik voor die kamera.

ʼn Verlowing fotosessie moet nie ʼn straf wees nie, maar meer ʼn lekker pret ervaring.  Tiffany en Jacques wou graag ʼn verlowing fotosessie doen om mooi foto’s te hê vir hulle spaar-die-datums kaartjies.  Dit is een van die redes hoekom paartjie verlowing foto’s wil hê.

Nie net vir mooi foto’s nie, maar dit help ook die paartjie om minder gestres te wees oor hul troudag se fotosessie.  Opsoek na ʼn trou fotograaf vir julle verlowing fotosessie?  Besoek gerus Mooi Troues se Trougids vir baie oulike trou fotograwe.

Jaques en Tiffany se plaas verlowing fotosessie is een wat jy nie moet mis nie, so rol af om meer foto’s te sien.

Die paadjie wat gelei het tot die verlowing:

Ons het mekaar ontmoet by die kerk.  Dit was ʼn lang staar in mekaar se oë en toe ʼn glimlag vir mekaar, waarna ons onmiddellik verlief geraak het.  Ons het geweet dat ons eendag met mekaar gaan trou, maar het gewag en vertrou op die Here en 7 jaar later het die tyd aangebreek.  Die Here het ons eers kom voorberei in die wag tydperk.

Die groot vraag:

Ons verlowing was absoluut ʼn verassing.  Tiffany het glad nie eers ʼn vermoede gehad nie.  Jaques het alles só fyn beplan en presies haar hartsbegeertes waar gemaak.  Tiffany wou alleen wees en nie ʼn gehoor daar hê nie aangesien sy ʼn baie stil en skaam persoon is.  Jaques het presies alles ingeneem wat sy voorheen al genoem het in verband met die verlowing.

Tiffany se beste vriendin het gehelp met die reëlings.  Sy het ook weggekruip by die venue om skelm foto’s van die groot oomblik te neem – wat een van Tiffany se versoeke was.  Jaques het vir haar gesê dat hulle piekniek gaan hou, maar ʼn luukse piekniek.

Hy het reëlings getref met die persone by Lethabo Estate in Lanseria wat ʼn privaat piekniek langs die rivier vir hulle voorberei het op 30 Oktober 2021.  Tiffany het gedink dis ʼn ‘herdenking viering’ omdat dit naby aan ons 7 jaar herdenking was en dis ook wat Jaques gesê het.

Jaques het toe vir Tiffany ʼn geskenk gegee.  Dit was ʼn hout boks met ʼn boodskap op en ʼn Bybel binne.  Terwyl sy die boks oopmaak en die geskenk bewonder hoor sy haar naam ‘Tiffany’ en nie ʼn noem naampie nie, maar haar NAAM!

Sy het omgekyk verbaas en hy het op sy knieg gestaan met ʼn ring in sy hand.  Sy was so oorval met skok dat sy nie ʼn woord kan onthou wat hy gesê het of ʼn woord kon uitkry nie.  Jaques het naderhand die stilte gebreek en gesê “Jy moet antwoord hoor”. Die antwoord was natuurlik JA en trane het begin vloei, maar trane van blydskap het gevloei.  Ons kon letterlik nie wag om almal te video call daarna nie. Tiffany wou net haar ring af ‘show’.  Dit was die beste dag van ons lewens.

Hoekom ons mekaar liefhet:

Tiffany van Jaques:

Hy is ʼn uitsonderlike vroom en godvresende man wat homself onderwerp aan God se lyding.  Sy karakter en menswees is só mooi, hy weerspieël Jesus en Sy selfopofferende gees en liefde vir ander.  Jaques aanvaar my vir wie ek is, met al my onvolmaakthede.  Hy is verskriklik aantreklik vir my, maar die mees aantreklikste kwaliteit wat hy besit is sy liefde vir Jesus.  Jaques is ʼn man wat vir my bid.  ʼn Man wat homself voor die Here verneder en Sy aangesig soek.

Hy gee altyd in oorvloed vir my al beteken dit hy kom tekort.  Jaques doen nooit iets met ʼn verwagting om enige iets terug te kry nie, maar gee sy alles vir almal.  Hy sien altyd die mooi en goed in ander.  Jaques is die vriendelikste persoon met so mooi persoonlikheid wat almal aantreklik vind.  Hy is ʼn besonderse mens wat woorde nie kan beskryf nie.  Jaques is die man van my drome en gebede!

Jaques van Tiffany:

Sy is ‘n ware illustrasie van God se prag, beeldskoon binne en buite.  Tiffany is vreeslik hardwerkend en doelgerig.  Haar woord is haar eer, wat ookal sy doen, doen sy volheid en volhard daarin. Tiffany se liefde vir God word weerspieël in alles wat sy doen.  Haar glimlag vat donker dae weg en laat my vergeet van al my bekommernisse.  Tiffany se lag is aansteeklik en dis ‘n voorreg om haar in my lewe te hê.  Ek het gebid vir iemand soos sy en nou kan ek binnekort haar my vrou noem!

Tydperk voordat die knoop deurgehak word:

Ons troudag is die 15de Junie 2023.  Dit is ʼn jaar en 8 maande na ons verlowing.

Die verloofring:

Tiffany het eenkeer vir Jaques ʼn foto gewys van die ring wat sy eendag wil hê.  Hy het dit presies reg gekry.  Die ring is perfek en haar droom ring!  Boonop dit het Jaques haar gunsteling Bybelverse binne die ring graveer wat dit nog meer spesiaal maak – Psalm 73:25-26

Wie het ek in die hemel behalwe jy? En die aarde het niks wat ek begeer behalwe jou nie. My vlees en my hart mag misluk, maar God is die sterkte van my hart en my deel vir ewig.

Daar is ook ʼn blou Sapphire steen binne in die ring se bandjie wat geassosieer word met ‘goddelike guns’ en ook ʼn simbool is van toewyding aan God.

Rede vir die verlowing fotosessie:

Ons wou graag mooi foto’s hê vir ons spaar-die-datum kaartjies en trou webtuiste.  Die fotograaf is amazing!  Ons foto’s is alles wat ons wou hê en nog meer.  Dis letterlik perfek!

Inspirasie agter die verlowing fotosessie:

Ons wou graag ons verlowing foto’s in die natuur neem.  Toe het ons fotograaf vir ons opsies gestuur op die plaas en die plaasdam met die windpomp was net perfek.  Ons is verlief op ons fotograaf se styl.  Die foto’s het ons verwagtinge oortref!  Sy het ons ook gemaklik laat voel en dit gevoel asof ons mekaar lank ken.

Verwagtinge en vrese vir die verlowing tydperk :

Op hierdie stadium is die verlowing tydperk stresvol met al die troureëlings.  Ons moet onsself gereeld herinner waaroor dit gaan en dat Abba Vader in beheer is.  Is bang ons vergeet iets in verband met die troureëlings, asook probeer almal gelukkig hou, maar ons raak net stil voor die Here en lê dit by Sy voete neer en onmiddellik spoel ʼn vrede oor ons.  Ons weet Wie veg vir ons en treë op elke gedeelte van ons lewens in vir ons.  Die Here het nog heeltyd kom voorsien en weet ons dat Hy altyd sal.

Visie vir droomtroue:

Ons wil graag hê die Here moet die geleentheid gebruik om grondgebied in te neem en Sy koninkryk te bevorder.  As daar een ding is wat die gaste moet saam neem van daardie dag is ons hartsbegeerte dat hulle die Here se teenwoordigheid sal ervaar.  Ons gebed is dat Hy verheerlik sal word.