Luke & Carla se Winter Strand Troue aan die Weskus

Luke en Carla se Winter Strand Troue aan die Weskus is gevier by die gewilde Blue Bay Lodge in Saldanhabaai. Hulle het ŉ warm, gesellige geleentheid verlang te midde van die pragtige natuurskoon. Dit was ŉ intieme naweekfees van hul liefde saam met hul naaste familie en vriende, wat reeds die Vrydagaand afgeskop het met ŉ Weskus-mosselpot en aktiwiteite soos kajak.

Die winterweer was perfek vir hul seremonie op die goedversorgde grasperke van Blue Bay Lodge met ŉ pragtige uitsig oor Saldanhabaai.

Om die snoesige atmosfeer te beklemtoon, het hulle ŉ kleurskema van wit, groen en ŉ tikkie oranje gekies. Hul troudekor het bestaan uit vars loof, olyfgroen waterglase, kershouers en kerse. Om die troue nog meer spesiaal te maak, is die blommerangskikkings op die tafels deur Carla se 88-jarige ouma gedoen.

Carla het twee trourokke gehad wat haar styl en persoonlikheid perfek weerspieël het. Die eerste rok, wat sy tydens die seremonie gedra het, was ŉ elegante ontwerp met knope en ŉ fyn beldjie, saam met ŉ dramatiese sluier wat haar voorkoms onvergeetlik gemaak het. Haar tweede rok, wat sy vir die onthaal gedra het, was meer gemaklik maar steeds elegant, sodat sy vrylik kon dans en beweeg. Om hierdie tweede rok uniek te maak, het sy moue laat byvoeg.

Rol af en sien hoe pragtig ŉ winter strand troue aan die Weskus kan wees. Ons hoop julle geniet Luke en Carla se storie en hul pragtige trou foto’s.

Trourok:

Carla het geweet dat sy van die begin af twee trourokke wou hê vir die verskillende dele van hulle groot dag. Haar visie vir haar seremonie-trourok was ŉ elegante en eenvoudige ontwerp, waar gemak nie noodwendig haar eerste prioriteit was nie. Sy het ook ŉ dramatiese sluier gekies om die voorkoms onvergeetlik te maak. Nadat sy die een-skouer noupassende rok gekoop het, het sy knopies en ŉ beldjie laat aanwerk.

Vir die onthaal het Carla besluit op ŉ gemaklike rok wat steeds elegant lyk. Hierdie rok was ontwerp sodat sy met vryheid kon dans en baljaar gedurende die vieringe. Omdat sy mal is oor dramatiese moue, het sy dit in haar onthaal-rok ingesluit, wat die styl nog meer opvallend gemaak het. Haar keuses weerspieël haar styl en persoonlikheid.

Paartjie se Verlowing:

Ons is beide baie lief vir die bos, en daarom was dit net gepas dat ons verlowing plaasgevind het op ŉ plek wat vir ons baie spesiaal is. Op 12 Januarie 2024, tydens ŉ besoek aan Addo Olifantpark saam met Carla se gesin, het Luke die groot vraag gevra.

Dié spesiale oomblik het gebeur tydens ŉ middag-safari by ons gunsteling-uitkykpunt in die park, Zuurkop. Omring deur die ongerepte skoonheid van die natuur, met panoramiese uitsigte oor die uitgestrekte park, het Luke op een knie gegaan en Carla gevra om sy vrou te word. Dit was ŉ oomblik van pure vreugde en opregte liefde, en Addo het vir ons nóg meer betekenis gekry as die plek waar ons ons lewens saam begin het.

Verloof- en Trouringe:

Carla se verloofring is ŉ geelgoud Browns pêrel- en diamantring. Dit is ŉ klassieke en tydlose ontwerp met ŉ pêrel wat omring is deur ronde briljant-geslypte diamantjies. Carla het van kleins af geweet sy soek eendag ŉ pêrel trouring en dink Luke het ŉ uitstekende, unieke keuse gemaak. Luke se geelgoud troupand is soortgelyk aan beide ons pa’s se trouringe en dit was die inspirasie. Die ring herinner ook aan Carla se oupa se ring en is baie kosbaar.

Trou Dekor en Styl:

Ons troue was ontwerp om nie net ons spesiale dag te vier nie, maar ook om ŉ naweek-ervaring te skep waar ons almal wat ons lief het bymekaar kan bring en kan feesvier. Ons het Saldanha aan die Weskus gekies as ons bestemming, met sy pragtige ligging net ŉ paar tree van die see af. Die naweek het afgeskop met ŉ Vrydagaand Weskus-mosselpot, wat ons saam met familie en vriende geniet het. Die meeste van ons gaste het in die Lodge oornag. Laatnag kuiers en geselsies om die vuur het ŉ intieme en gesellige atmosfeer geskep. Die perfekte begin tot ŉ onvergeetlike naweek! Gaste wat saam ontbyt geniet en aktiwiteite soos kajak aanpak het die geleentheid geskep om tyd saam deur te bring en die ervaring nog meer spesiaal te maak.

Ons kleurskema was ŉ kombinasie van wit en groen, met ŉ speelse tikkie oranje om ŉ vrolike en helder aksent te bied. Die dekor is eenvoudig gehou om die venue se natuurlike skoonheid te komplementeer. Ons het tafels versier met vars loof, terwyl Carla se ouma liefdevol blomrangskikkings gedoen het vir elke tafel. Olyfgroen waterglase, kershouers, kerse en -lapservette het die gewenste gevoel afgerond, terwyl elke gas ŉ persoonlike skets van hulle as geskenk op hul bord ontvang het.

Die weer het perfek saamgespeel, wat ons in staat gestel het om buite op die grasperk voor die see ons seremonie te hou. Dit het ŉ balans geskep tussen die ongerepte natuurlike omgewing en ons intieme troustyl. Ons troue was gemaklik, warm, en vrolik – ŉ naweek vol liefde, lag, en die spesiale mense in ons lewens, alles teen die asemrowende agtergrond van die Weskus strand.

Trou Begroting en Beplanning:

Ons het 90 gaste gehad met ’n trou begroting van R200 000, en ons het ses maande geneem om die troue te beplan. Ons het ’n professionele trou koördineerder gebruik om te help met al die reëlings en om seker te maak alles verloop glad op die dag.