Wessel & Lisa se Sprokiesmooi Plaastroue in Bronkhorstspruit

Wessel en Lisa se sprokiesmooi plaastroue in Bronkhorstspruit was soos iets uit ŉ droom. ŉ Dag vol liefde, skoonheid en die magie van die platteland.

Lisa het pragtig gelyk in haar trourok en almal se asems weggeslaan. Die valletjies wat so delikaat oor haar rok gesprei het, saam met die fyn pêreltjies wat subtiel rondom haar hals en skouers glinster, het haar soos ŉ sprokies prinses laat lyk. Haar strooimeisies, geklee in die mooiste MiBella Bridesmaids rokke in natuurlike kleure soos ligte bruin, groen, roesrooi en pienk, het haar stralende beeld perfek gekomplementeer. Dié aardse kleure het só mooi by die tema van die troue gepas.

Onder die skadu van ŉ majestueuse Wilgerboom, het Wessel en Lisa hul geloftes uitgeruil in die teenwoordigheid van hul geliefdes. Die natuurlike omgewing het elke oomblik van hul seremonie iets besonders gemaak – ŉ viering van liefde omring deur die rustigheid van die veld.

Vir hul onthaal het die paartjie ŉ knus skuur op die jagplaas gekies. Hier het rou houttafels en ŉ mengsel van vintage en moderne dekor die ruimte gevul, met rietmatjies en gebrande oranje servette wat ŉ tikkie warmte gebring het. Ligbruin en groen glase het net die regte afronding gegee, terwyl klein vetplantjies in terracotta potjies elke tafel versier het – ŉ eenvoudige, maar tog stylvolle alternatief vir tradisionele blomme.

Die hoogtepunt van die dag was die fotosessie tydens sonsondergang. In die sagte, goue lig van die laaste strale van die dag, het Wessel en Lisa se liefde stralend vasgevang in elke foto. Dit was ŉ oomblik wat die romanse van hul troue perfek gevang het, elke fotos ‘n herinnering aan hul spesiale dag.

Rol af om meer te lees oor Wessel en Lisa se sprokiesmooi plaastroue in Bronkhorstspruit.

Paartjie se Liefdesreis:

Ons het albei as studente ŉ ekstra inkomste probeer verdien deur promosie werk te doen in 2019.

Wessel was alreeds een jaar lank by die maatskappy en ek het saam met ŉ vriend aansoek gedoen vir ŉ pos. Die dag toe die onderhoude gehou is het my vriend my in kennis gestel dat hy toe nooit aansoek gedoen het vir die werk nie. Nietemin het ek besluit om alleen voort te gaan. Op my heel eerste aand by die werk was Wessel die bestuurder wat my moes oplei. Na ŉ lang aand het die restaurant ons bederf met ŉ gratis aandete en ons het mekaar beter leer ken. Daardie selfde aand is ons vir ons eerste koffie by ŉ petrolstasie (want dit was al wat nog oop was). Van daar af het ons mekaar daagliks gesien en basies net nooit ophou kuier nie.

Oktober 2022 het ek “toevallig” ingeskryf vir ŉ ‘wen ŉ gratis fotosessie’ kompetisie waarin my sussie, Carli, my getag het op Instagram. Die fotograaf het bekendgestel op haar sosiale media dat ek die kompetisie gewen het en het my gekontak vir die gratis sessie wat ons toe boek. Op 21 Oktober 2022 het Wessel my gevra om met hom te trou terwyl die fotograaf elke oomblik kon vasvang.

Trourok:

Ek het geen idee of prentjie gehad van wat ek opsoek is na in ŉ trourok nie. Al wat ek geweet het is ek soek iets uniek, iets wat by die eenvoud en styl van ons troue en my as mens sal pas. Ek het sommer ŉ afspraak by Bride&Co gemaak om die proses aan die rol te sit. Ons kon vyf rokke kies, my idee was om iets in elke snit te kies sodat ons ŉ idee kan kry van wat by my sal pas.

My ma het een van die rokke gekies en ek het hom sommer heel eerste aangepas. Toe ek voor die spieël staan het ons almal geweet dít is my trourok. Die rok kon nie meer perfek vir my wees nie. Dit was ŉ “sample” rok, die enigste een gemaak, in presies die regte nommer. Dit was regtig asof dit vir my gemaak is.

My rok het pragtige tulle materiaal, wat met fyn pêreltjies gewerk is rondom die hals en moue op my skouers. My middel is beklemtoon met ŉ kant detail wat dan net bo my heupe weer uitloop in die tulle met pêrels op. Die res van die rok bestaan uit die tulle met pêrels en is in kort valle gewerk tot heel onder.

My rok was gemaklik, lig en stylvol met ŉ vintage twist. Ek het die hele aand in my rok deurgebring en kan eerlikwaar sê ek het hom tot volle benut en geniet.

Veloof- en Trouringe:

Wessel het twee klein diamante geskenk gekry by my pa, Werner, toe hy my ouers se toestemming gevra het om met my te trou. Hierdie twee diamante het aansienlike sentimentele waarde geheg vir my en my familie. Dit was die diamante wat in my oupa se trou ‘cufflinks’ gelê was.

Wessel het hierdie twee diamante geneem en dit deel gemaak van die uitleg van my ring. Hy het self die ring ontwerp en ek is absoluut mal daaroor.

Wessel se ring het ons by die Boeremark gekoop, ja julle het reg gelees. Dit is ŉ Tungsten ring waarvan hy baie gehou het en het daar en dan besluit dit is sy trouring.

Gunsteling herinneringe van die paartjie se troudag:

Ek kan eerlikwaar sê dat ons hele troue vir ons lekker was, selfs die dele wat nie heeltemal volgens plan verloop het nie!

Ons het elke oomblik probeer inneem en koester en was net só opgewonde om hierdie nuwe deel van ons lewe saam, as een, te kon begin en kon vier.

Ons dag was ekstra spesiaal omdat ons ons seremonie kon deel met my jong karate-studente wat rondom ons voete kon sit en elke oomblik kon waarneem. Breë glimlaggies en sprankelende ogies wat staar, wat ŉ voorreg om die oomblik met hulle ook te kon deel! Met ŉ wilde wind onder die Wilgerboom kon ons die Here se teenwoordigheid fisies voel. Ons kon nie vir ŉ groter seën vra nie.

Meer oor MiBella Bridesmaids:

MiBella Bridesmaids is ŉ aanlyn besigheid wat in bruidsmeisie-rokke spesialiseer. MiBella Bridesmaids bied bruide en bruidsmeisies die geleentheid om hul innerlike kreatiwiteit te ontbloot deur die moderne seleksie van vooraf ontwerpte toppies, rompe en moue te kombineer en dan hul unieke stempel by te voeg. Dit stel bruidsmeisies in staat om ŉ rok te skep wat perfek aansluit by die troue, insluitende kleur, grootte en styl.

Een opvallende kenmerk van MiBella Bridesmaids se proses is hul onwankelbare toewyding aan pasgemaakte skeppings. Konstruksie begin slegs nadat ŉ bestelling ontvang is, wat verseker dat elke rok noukeurig volgens die kliënt se presiese spesifikasies vervaardig word. Hierdie aandag aan detail en vakmanskap beklemtoon die individualiteit van elke bruidsmeisie.

Raad aan paartjies wat nou besig is met hul trou reëlings:

Onthou dit is JULLE dag. Doen en beplan wat julle graag wil. Daar is geen “moet of moenies” jy kan totaal en al besluit wat en hoe julle graag julle spesialiste dag wil vier.

Niks verloop altyd 100% soos beplan nie. Maak vrede daarmee dat iets dalk op die dag mag skeefloop of nie heeltemal gebeur soos wat julle gedink of verwag het dit sal nie. Dit is net so erg soos wat ŉ mens dit op die dag en in die oomblik maak, as mens lag daaroor en aangaan sal jy sien dat jy dit tien-teen-een nie eers regtig nodig gehad het nie.

Ons troukoek het nooit opgedaag nie, ons het elkeen ŉ cupcake gegryp van die tafel af en dit gehap. Nie een van die gaste het eens geweet daar moes eintlik ŉ troukoek wees nie!

Trou Venue:

Ons het albei geweet ons is opsoek na ŉ plaas venue.

ŉ Kennis van my het genoem dat sy betrokke is by ŉ gastehuis op ŉ plaas in Bronkhorstspruit en dat sy dink ŉ troue daar sal bitter mooi kan wees.

Die gastehuis is nie bekend vir troues nie en is eintlik ŉ jagplaas. Die bestuurders het kans gesien vir dié uitdaging. Ons het besluit om sommer onder die Wilgerboom te trou en die onthaal in ŉ skuur/stoorkamer te hou.

Met groot drome, baie idees en tonne hulp van familie, vriende en die bestuurders het ons dit moontlik gemaak. Dit kon nie meer perfek, meer “Lisa en Wessel” uitgedraai het nie. Die venue en sy antieke/vintage twist met die natuur reg rondom ons het ons persoonlikheid en verhouding tot op die punt uitgebeeld.

Trou Dekor en Styl:

Ons kleurskema was natuurlike kleure. Kleure soos olyfgroen, roesbruin, beige, champagne ens.

Die dekor was hoofsaaklik Olyfboom blare wat deur die hele troue ŉ rol gespeel het en simboliek gebring het. Ons het saam ŉ Olyfboompie geplant in ŉ pot as deel van ons seremonie. Saam met dit het ons vetplante en kaktusse gebruik in terracotta potjies wat orals gebruik is, selfs op die tafels.

Daar was geen blomme op die tafels gebruik nie, slegs vetplante, kaktusse en Bunnytails. Daar was nie een tafel wat presies dieselfde gelyk het nie.

Verskillende matte is ook as dekor beide by die seremonie en onthaal gebruik.

Ons het baie dekor uit ons eie huise en antieke meubels/goedere geleen en daarmee mooi gemaak. Daar was ŉ klomp interessante kuier hoekies en plekkies geskep vir gaste om te kon ontspan en kuier.

Ons het tydens die bruidspaartjie se fotosessie oorgroot speletjies beskikbaar gehad. Groot Jenga, Groot Vier-in-ŉ-ry, Groot Kringetjies en Kruisies ens. was ŉ paar van die gunstelinge dit het ons gaste besig gehou totdat die onthaal kon begin.

Eerste Dans:

Theuns Jordaan – By Jou

Trou Begroting en Beplanning:

Ons het vir 110 gaste beplan, met ŉ trou begroting van R1 800 per persoon. Die beplanning van die troue het ons oor ŉ tydperk van 10 maande self gedoen, aangesien dit ŉ selfdoen-troue was.