John-Hunter & Ellé se Stylvolle Troue in Vredendal

John-Hunter en Ellé se stylvolle troue in Vredendal het ‘n sagte, neutrale tema gehad wat die romantiese atmosfeer van hul spesiale dag perfek weerspieël het.

Ellé het soos ‘n droom gelyk in haar pragtige trourok, eenvoudig in ontwerp, maar met ‘n tydlose elegansie wat haar natuurlike skoonheid beklemtoon het. John-Hunter, in sy ligte pak en wit skoene, sonder das, het die essensie van ontspanne styl vasgevang. Hulle saam het gestraal in ‘n sorgvrye, maar tog gesofistikeerde voorkoms.

Die blommerangskikkings was eenvoudig betowerend. Gypsophila (baby’s breath), sag en fyn, het die atmosfeer met ‘n tikkie betowering gevul en elke hoekie van hul seremonie en onthaal subtiel omtower. Die talentvolle span van Wild & Orgidee het meesterlik elke rangskikking geskep. Van die waterval pilare by die altaar tot die delikate Gypsophila-wolke langs die paadjie, en die tafelrangskikkings wat soos sagte sprokie droom gelyk het.

Hulle visie het eenvoudige begin met kerse en ‘n neutrale palet, en onder die kreatiewe leiding van Love Affair Events and Decor Hiring, saam met Ellé en haar ma, het die tafel dekor perfek ontvou. Die tafeldekor was ‘n simfonie van eenvoud en styl, met tikseltjies kleur van kerse wat later ‘n romantiese kerslig-atmosfeer by die onthaal geskep het.

Die dak foto’s is baie mooi met die sonsak se goue strale wat oor die dorp uitgestrek. Dit het ‘n stedelike, boheemse gevoel geskep, vol romanse en intieme oomblikke wat vir altyd in hul harte vasgevang sal bly.

Rol af om meer te lees oor die paartjie se pragtige liefdesreis en geniet die foto’s deur Jacki White Photography.

Paartjie se Liefdesreis:

Soos elke moderne liefdesverhaal het ons op Instagram ontmoet. Ons het mekaar in 2020 begin “follow”, ‘n foto hier en daar “gelike” maar nooit gedink ons sou opeindig waar ons nou is nie. In 2022 het John-Hunter vir my ‘n boodskap gestuur om te vra oor die hond wat ek op my Story gepos het. Sy hond is ‘n maand tevore skielik orlede en hy sê my Story het hom aan sy hond laat dink. Van daai dag af het ons net gekliek en elke naweek drie en ‘n half ure op en af gery om mekaar te sien totdat ek amptelik plaas toe getrek het.

Ons is altwee baie lief vir die natuur en buite wees en so het ek eendag vir John-Hunter genoem dat ek bitter graag die Namakwaland blomme wil sien. Dit was op my bucketlist. Die aand voor ons verlowing het John-Hunter gesê ons gaan die volgende dag blomme kyk, maar dat ek ‘n tassie moet pak want ons gaan sommer iewers oorslaap en ‘n naweek daarvan maak. Ek was só opgewonde en het geen idee gehad van wat hy eintlik beplan het nie.

Die verlowing:

Oom Ryan se Kliphuis is Klawer se versteekte juweel. Dit spog met asemrowende uitsigte van die Olifantsriviervallei en die mooie Maskamberg. Toe ons daar aankom, het ons die eienaar ontmoet om die sleutel af te haal. Hy was besig om fotos te neem van al die blomme in die veld en ek het by myself gedink hoe oulik dit is dat hy so trots is op die blomme wat op sy plaas groei. So half in die gesels het hy genoem dat ons dalk ‘n vinnige foto tussen die blomme moet neem voordat ons na die huis toe gaan. Ek het vir ‘n oomblik my rug gedraai om die uitsig in te neem en toe ek terug draai was John-Hunter op sy knieg en vra my om te trou! Na ons groot oomblik vind ek uit die eienaar was in geheim die fotograaf!

Trourok:

My droom trourok! Ek dink elke meisie het al ‘n “droom trourok” Pinterest board gemaak en ek was beslis een van hulle. Ek het altyd gedink ek gaan vir ‘n klassieke A-lyn silhoeëtte met lang moue, maar dit het alles verander toe ek by Blanco Bridal Couture in Kaapstad instap. Celine het rokke gekies op grond van die inspirasie fotos wat ek vir haar gestuur het. Sy het ook ‘n paar rokke gekies wat heeltemal anders was. Die eerste rok wat ek aangepas het was iets wat ek NOOIT gedink het ek van gaan hou nie, maar op die ou einde was dit my trourok!

Modern en elegant, met ‘n fit en flare silhoeëtte en ‘n gesofistikeerde reguit neklyn. Die crepe materiaal het so mooi drapeer en het my beeldskoon laat voel. Ek was mal oor hoe eenvoudig die rok was en het gevoel ‘n klassieke sluier sal die hele voorkoms afrond. ‘n Pinterest idee wat ek baie graag wou hê was tulle moue – dit het net daai ietsie ekstra gebring!

Veloof- en Trouringe:

Ons altwee wou iets hê wat eenvoudig en mooi is. John-Hunter se ring is goud met ‘n brushed satin voorkoms en afgeronde rand. My verloof ring is ‘n peervormige moissaniet in ‘n goue “setting” en my troupand is ‘n fyn goue band met vyf moissaniet in ‘n bevel setting.

Meer oor Love Affair Events and Decor Hiring:

Love Affair Events and Decor Hiring is al 17 jaar in die trou bedryf en spesialiseer in volledige dekor- en blomme konsepte vir troues.

Met ‘n verhuringswinkel in Somerset-Wes, bied Love Affair Events and Decor Hiring ‘n wye verskeidenheid dekor opsies vir troues en funksies. Ander dienste sluit in hulpverlening aan selfdoen-bruide om hulle konsepte perfek uit te werk, sodat optimale gebruik van hulle begroting gemaak kan word.

Koördinerings dienste word ook aangebied, insluitend op-die-dag koördinering vir bruide wat self hulle troue beplan het, maar nie ‘n toepaslike maatskappy het om dit op die dag uit te voer nie. In hierdie geval neem Love Affair Events and Decor Hiring die laaste paar weke oor en sorg dat die troue volgens die paartjie se bespreekte planne verloop.

Verder bied Love Affair Events and Decor Hiring funksie koördinering aan wat begin sodra die seremonie op die dag aan die gang kom. Dit is ‘n wonderlike geleentheid om die paartjie goed by te staan, sodat hulle kan ontspan en hul spesiale dag ten volle kan geniet.

Trou Diensverskaffers wat uitgestaan het vir die paartjie:

Die Keldery se span was FANTASTIES! Hulle was altyd daar, soms drie maal per dag, om vrae te beantwoord en al die tafels en dekor weer saam met my deur te gaan. Hulle het selfs vir my en John-Hunter ‘n aandjie gereël waar ons die spyskaart waarop ons besluit het kon proe. Die kos was uit die boonste rakke en die canapé tafel was ‘n reuse treffer. Baie, baie dankie aan Luchelle en haar span vir die ongelooflike diens en vir al hul moeite. Die troue het vlot geloop!

Gunsteling herinneringe van die paartjie se troudag:

John-Hunter se gunsteling herinnering van ons troudag was toe hy my vir die eerste keer sien afstap. Ons het die middag voor ons troudag mekaar laas gesien. Hy sê hy het nie geweet wat om te verwag nie, maar hy was baie opgewonde. Vir iemand wat gesê het hy gaan nie huil nie, was daar beslis ‘n verlore traantjie gepik.

My gunsteling herinner was ons bruid en bruidegom fotosessie. Ons fotograaf, Jacki, het ‘n voorstel gemaak om op Kaap Agri se dak in die dorp tydens sonsondergang, fotos te neem. Sy het gesê bring jul sonbrille en tekkies saam. Dit was só lekker om vir die eerste keer half net in ‘n bubble saam te wees en besef ons is werklik getroud! Die uitsig was iets wat ek nie verwag het nie. Ek het nog nooit ons dorp so mooi gesien. Die sagte oranje lig van die laaste bietjie son het dit al mooier gemaak.

Meer oor DJ Jinx:

Welkom by DJ Jinx, jou betroubare en ervare platejoggie in die Wes-Kaap. Met meer as tien jaar in die musiekbedryf, spesialiseer ek daarin om ‘n onvergeetlike atmosfeer te skep vir elke geleentheid, of dit nou ‘n troue, korporatiewe funksie of partytjie is. Ek bied ‘n diens wat ‘n 300 kilometer radius rondom Kaapstad dek, en is daartoe verbind om jou spesiale dag of geleentheid lewendig en vol energie te maak. My musiek repertorium sluit alles in van Afrikaanse gunstelinge tot internasionale treffers, met iets vir elke smaak en ouderdom.

Wat my uitstaan, is my passie vir musiek en my toewyding aan kliënt tevredenheid. Ek werk uitsluitlik met moderne toerusting van topgehalte en verstaan hoe belangrik tydsberekening en vloeiende oorgange is om ‘n foutlose ervaring te verseker. Of jy nostalgiese “oldies” soek of die nuutste treffers, ek speel presies wat jou gaste nodig het om op die dansvloer te bly. Kontak DJ Jinx vandag en kom ervaar hoe ek jou geleentheid in ‘n musiekfees kan omskep wat niemand gou sal vergeet nie!

Trou Venue:

Ons wou dit plaaslik hou en naby genoeg vir ons vriende en familie. Die Keldery is net buite die Vredendal geleë en kon byna alles vir ons bied. Hulle het al die koördinering gedoen die dag voor en van ons troue. Die uitsig en mooi struktuur van die venue is wat gemaak het dat ons dit vasmaak. Daar is ‘n fantastiese uitsig van die Maskamberg vanuit die kapel en tent waar ons onthaal was. Ons was mal oor die bistro ligte wat die hele tent vol gehang het. Dit het beslis ‘n romantiese atmosfeer geskep.

Meer oor Wild & Orgidee:

Die blomme-liefhebbende span agter Wild & Orgidee is jou gewilde bloemiste vir alles wat spesiale geleenthede betref! Van verjaarsdae en herdenkings tot funksies en troues is Wild & Orgidee die span waarop jy kan staatmaak.

Hierdie magtige span van vier is gebaseer in die gesellige dorpie Vredendal in die Matzikama-streek. Altyd op die uitkyk vir die nuutste neigings, neem Wild & Orgidee ook die tyd om na hul kliënte te luister om seker te maak dat daar aan elke behoefte voldoen word. Al is die span klein, groei hulle vinnig, een spesiale geleentheid op ‘n slag!

Wild & Orgidee is verbind tot persoonlike aandag aan elke kliënt om 100% tevredenheid te verseker. Met die uitbreiding van hul besigheid het hulle nou ook trou- en geleentheid verhurings vir intieme vieringe in die area ingesluit. Dus, as jy iemand nodig het om jou visie bord tot lewe te bring, of bloot jou vertroue in Wild & Orgidee wil stel vir jou volgende groot geleentheid, is hierdie dinamiese span hier vir jou!

Trou Dekor en Styl:

Ons wou dit neutraal en minimalisties hou met die tafels en dekor en het ŉ titseltjie kleur ingebring met ons lang kerse. Ons gekose blomme was Gypsophila (baby’s breath) en wit rose en dit het ons reg deur die hele troue gebruik. Die wit het onsettend mooi vertoon in die aand en het ook ŉ romantiese atmosfeer skep. My ruiker was groot wit rose en ‘n Gypsophila bossie vir my strooimeisies. Die onthaal tafels het elkeen ŉ Gypsophila loper gehad met twee lang steel rose aan albei kante. Ons het ŉ kombinasie van verskillende soorte en groottes kerse gehad in verskeie kleure: roomwit, sand, en botter geel. Die sagte geel kerse het die perfekte bietjie kleur ingebring.

Eerste Dans:

Enkelvoud – Annelie

Raad aan paartjies wat nou besig is met hul trou reëlings:

Dit is JULLE dag. Maak besluite wat vir julle reg voel en doen waarvan julle hou. Dit is baie maklik om te verdwaal in mense se opinies en goedjies wat jy dink jy moet hê, soos byvoorbeeld custom pajamas en glase. Jy kan nogsteeds ‘n lekker en spesiale dag hê sonder al die dinge-en-datte. Hoewel dit oorweldigend is om al die reëlings te tref, maak tyd vir mekaar en geniet mekaar.

Trou Begroting en Beplanning:

Die paartjie het hul intieme troue vir 75 gaste self beplan, met ‘n begroting van R3 000 per persoon. Hulle het ses maande lank aan die troureëlings gewerk om hul droomdag waar te maak as ‘n pragtige selfdoen troue.