Ons is omtrent opgewonde om Cameron en Twané se strand verlowing fotosessie met Mooi Troues se lesers te deel. Hierdie paartjie se fotosessie is só mooi en die perfekte voorbeeld vir romantiese strand verlowing foto’s. Om ʼn verlowing vas te vang is só belangrik, want dit is so ʼn spesiale tydperk in ʼn paartjie se liefdesreis.
Die rede vir die paartjie se verlowing fotosessie was om pragtige foto’s te kry vir hul trou uitnodigings en ook om te gebruik by hul troue. Dit is ʼn briljante idee! Daar is soveel redes hoekom ons altyd sal motiveer dat ʼn paartjie ʼn verlowing fotosessie moet hê.
Nie net is dit om die spesiale tydperk vas te vang in pragtige foto’s nie, maar dit help ook die paartjie om te oefen voor die kamera, sodat hul minder gestres voel op hul troudag. So ken julle die fotograaf en hoe die fotograaf werk. Dit maak die paartjie meer gemaklik en so ook die trou fotograaf en mens kan dan ook sien in die foto’s as die paartjie meer ontspanne is.
As julle besig is om jul troue te beplan en opsoek is na fantastiese trou diensverskaffers, besoek ons oulike aanlyn trougids. In ons trougids sal jy diensverskaffers vind regoor Suid-Afrika wat opgewonde is om jou droom troue ʼn realiteit te maak.
Ander dinge wat ʼn verlowing fotosessie ekstra mooi maak is die kleredrag van die paartjie. Kyk net hoe netjies lyk Twané en Cameron. Hulle uitrustings pas bymekaar en dit is neutraal so vertoon so mooi op die foto’s.
Rol af om meer te sien van die paartjie se strand verlowing fotosessie en om meer te lees oor hulle storie.
Die paadjie wat gelei het tot die verlowing:
Ons het op skool ontmoet, ‘n tipiese hoërskool liefdesverhaal! Ons is 6 jaar en ‘n paar maande in ‘n verhouding gewees voor die verlowing.
Die groot vraag:
Ons is die 27ste April 2022 verloof, by Rut se Yellow Door Art Gallery in Mosselbaai. Die fisiese verlowing was ‘n verassing, maar ons het wel oor verloof raak gesels. Ons het die ring saam gekies, en daarna was alles ‘n verassing! Ons het nie familie teenwoordig gehad nie, dit was net ons en die personeel in die hele gallery. Alles was só spesiaal en só fyn beplan, ek het nie eers iets verwag nie!
Hoekom ons mekaar liefhet:
Cameron is my rots, die een wat sommer alles laat beter voel wanneer dinge dalk mag moeilik gaan. Ons is al deur só baie saam, en ek kan net dankbaar wees vir die man wat ek gekry het! Hy is net eenvoudig my gunsteling mens! Ek kan nie een eienskap kies wat besonders is nie, want alles van hom is vir my besonders.
Twané is my mens. Die een wat my veilige hawe is, en die een wat my bystaan maak nie saak wat nie. Soms as ek na haar kyk, kan ek nie glo ek het iemand soos sy gekry nie. Voel onwerklik vir my party dae. Ek het so lank hiervan gedroom, en nou is my droom my realiteit, my Mev. Izaakse.
Tydperk voordat die knoop deurgehak word:
Ons troudag is die 16de Desember 2023. Dan sal ons amptelik al ‘n jaar en 8 maande verloof wees. Tyd kan nie vinnig genoeg vlieg nie!
Die verloofring:
Ons het die trouring saam gekies, dis haar droom ring al van ons 18 jaar oud is. Ek kon dit ‘n realiteit maak deur The Diamond Channel in Johannesburg. Die ring is só spesiaal en uniek, pas perfek by haar!
Rede vir die verlowing fotosessie:
Ons het ‘n fotosessie gedoen vir ons trou uitnodigings, sowel as vir gebruik by die troue. Ons verlowing sessie is klassiek, eenvoudig en stylvol, dit pas perfek by die troue se tema en ons as ‘n paartjie.
Inspirasie agter die verlowing fotosessie:
Ons het die styl gekies om by die troue se tema te pas. Ons wou graag mooi foto’s gehad het, wat eenvoudig, maar tog onbeskryflik mooi is. Ek dink die weer en die kleure het so groot rol gespeel tot die prag foto’s.
Verwagtinge en vrese vir die verlowing tydperk :
Omrede die troue so naby is, het ons alreeds soveel deurgemaak en ervaar. Ons verwagtinge oortref definitief die vrese. Die tydperk waardeur ons is, het nie baie uitdagings gehad nie. Ons het ‘n baie groot ondersteunings raamwerk en soveel mense wat ons bystaan, dit het die verlowings tydperk en trou beplanning soveel makliker gemaak.
Niks kan ooit perfek wees nie, maar die doelwit is tog net om alles saam mekaar te doen en ervaar. En die grootste prys wat ons kan kry is om uiteindelik vir altyd saam te kan wees. Alles anders as dit is net ‘n bysaak.
Visie vir droomtroue:
Ons trou by die mooiste venue, met ‘n volle see uitsig! Alles wat ons van kon droom en nóg meer. Die troue gaan baie intiem wees met net die naastes wat gaan bywoon. Ons het die troue se kleure baie neutraal gehou, en gefokus op die onbeskryflike uitsig! Die troue se hele uitleg en beplanning is klassiek en tydloos! Werklik wat ons ingedagte gehad het. Om dit eenvoudig te stel, ons het ons troue kon beplan nes ons dit nog altyd visueel voorgestel het, en oor dit gedroom het!
- Fotograaf: Anina Harmse
- Verloofring: The Diamond Channel
