Ons deel vandag die pragtige stedelike verlowing fotosessie van Henri en Carolina met jou. La Belle Vita Photography het die pragtige foto’s afgeneem en ʼn tydjie saam met die oulike paartjie spandeer in Johannesburg. Ons deel graag verlowing foto’s, veral as dit in die stedelike kant van ons land afgeneem is. Daar is net iets aan die stads lewe wat vir ons spesiaal is. Loer bietjie na die paartjie se foto’s hier onder en lees meer oor hulle ontmoeting en verlowing.
Hoe het julle ontmoet?
Ons het op Universiteitsoord se Tuks eerstejaarskamp in 2006 ontmoet. Ek was ʼn Erika-eerstejaartjie en Henri was ʼn Maroela 2de jaar en ʼn kampleier. Die eerste keer wat ek Henri gesien het, het hy my gehelp om my tas in die bus te laai. Ek het gedink hy is baie aantreklik. Geluk was aan ons kant toe hy my groepleier was. Ons het sommer die een aand tot 03h00 die oggend gesit en gesels. Ons het nie amptelik uitgegaan in my eerstejaar nie, maar ek was die “date” wat hy moes saambring vir ʼn naweek weg na Sabi Sands saam met vriende. Soos hulle sê, “the rest is history”.
Vertel ons meer van julle verlowing
Carolina vertel: Henri het my een Vrydagaand einde Julie heeltemal ontkant gevang deur vir my ʼn koevert te gee en daarna die hasepad te kies. In die koevert was ʼn Gautrain kaartjie, ʼn briefie en ʼn vliegtuigkaartjie Kaapstad toe. Ek is voorgesê in die briefie om hom nie weer te kontak totdat ek bevestig dat ek op die vliegtuig is. In die Kaap aangekom die volgende oggend het die wind vreeslik gewaai en het dit katte en honde gereen! Henri het beplan om my op Noordhoek se strand te vra maar die man moes vinnig ʼn tweede plan beraam met die weer wat nie wou saam speel. Hy het na Cape Point Vineyards in Noordhoek gegaan en gevra dat hul asseblief moet help. Hulle het ʼn pragtige privaat hoek in hul proe-kamer vir ons reggemaak met ʼn lekker bottel rooi wyn. Henri het die mooiste ring uitgehaal en om my hand gevra.
Henri vertel: Ons het baie van Chrissiesmeer gehou en wou nog altyd graag daar trou. Hulle was vol bespreek tot September 2015 maar weens ʼn kansellasie kon ek wel bespreek vir 28 Maart. Carolina was nog salig onbewus hiervan want ek moes eers gaan ouers vra! Twee weke later het ek gereël dat ons deurry na Florence Farm (Carolina was onder die indruk ons wil moontlik bespreek vir September 2015). Dis toe in die dennebos wat ek haar verras het met ons regte troudatum. Na maande se soek en spaar kon ek die perfekte ring laat maak en het haar verras met die naweek in die Kaap.
[section=Klik hier vir diensverskaffers]
![](https://www.mooitroues.co.za/wp-content/uploads/2021/03/MTTROUGIDS.png")
Besoek Mooi Troues se aanlyn Trougids. Hier sal jy betroubare diensverskaffers in Suid-Afrika vind vir jou troudag vanaf enige plek waar jy ‘n internet konneksie het en ‘n toestel wat gekonnekteer is tot ‘n aktiewe internet konneksie, wees dit jou slimfoon, skootrekenaar of ‘n rekenaar. Ons het seker gemaak ons lys slegs betroubare diensverskaffers wat jy kan vertrou om hulle beste te gee vir jou troudag. Indien jy nie vind waarvoor jy soek nie, kontak ons asseblief.
Is jy ‘n diensverskaffer wat op Mooi Troues wil adverteer? Klik hier vir ons advertensie kostes.
Artikel Diensverskaffers:
- Fotograaf: La Belle Vita Photography
